【疫後旅行】台灣澎湖避世之旅住絕景民宿食新鮮魚生 - 雅虎香港新聞

berlin-tours.blogspot.com

全球旅遊雖然因肺炎而暫停，不過當大家都期待疫後旅行之餘，都係時候做定功課，諗諗疫後可以去邊玩。短途旅行一定係疫後旅行趨勢，台灣自然係不二之選，今日敎大家暢玩台灣澎湖，人少又近大自然，自然令人可以放鬆心情，人都健康啲啦！

澎湖點去好？

澎湖位處台灣海峽，對岸就係雲林及嘉義縣。夏天為熱門旅遊季節，有大量水上活動亦有煙火嘉年華等。澎湖有機場每日定期由台灣本島各地方來往，於台北、台中、嘉義、台南及高雄均有航線，最遠由台北出發，機程約1小時，最近從嘉義、台南出發則半小時就到。另外於嘉義、台中及高雄都有渡輪每日往來，不過時間當然要耐少少，最快由嘉義出發約1.5小時，而由高雄前往則要4個多小時呢。

住：無敵海景玻璃屋民宿

澎湖為外島，四面環海，當然有唔少海景民宿，今次介紹呢一間就對正大海，而全部用上落地玻璃，景觀開揚！民宿外有泳池及庭園，可以對正大海游水及飲咖啡。室內方面採用日式裝潢，簡單又舒適，令人尤如置身家一樣。客房設有露台，而浴缸更對正大海，連浸浴都可以望正無敵海景。房間有2人房及4人房，情侶或一家大細都可以入住呢！而民宿最靚嘅房就係最高層「星空樓中樓四人房」，閣樓天花可以拉開玻璃天窗，就可以直接仰望星空，非常浪漫！

愛麗詩會館

地址：澎湖縣白沙鄉港子村20-5號

預訂：按這裡

食：超新鮮人龍刺身專門店

靠海吃海，澎湖當然有大量海產，而要揀最吸引水產店就必屬呢一間小小嘅魚生專門店。位處知名景點二崁古厝之中，純白色外牆配以仙人掌，有一陣仿古懷舊氣氛，而室內亦用木枱木櫈，明顯係小店格局，除咗堂食之外仲有一冰櫃出售一盒盒刺身魚片。至於店內供應嘅水產每日不定，視乎當天漁獲而定，老闆每朝天未光就去漁市場買貨，保證係即日鮮，價錢每份300台幣至600台幣，超級抵食！話說該店極具名氣，每朝一開店就有人排隊，售完即止呢！

魚好。刺身專賣店

地址：澎湖縣西嶼鄉22號之1

營業時間：9:30AM至5:30PM

玩：海上牧場認識海洋保育

咩係海洋牧場？原來呢間海洋牧場就係希望透過一系列活動及設施，教育參觀人士保育海洋嘅意識，極有意義！當中設有多個漁場，飼養多種魚類如象魚、石班、三線雞魚、魔鬼魚等。漁場仲設有小船，可以帶參觀人士出海體驗捕漁活動，亦會帶大家去到海岸範圍找尋新鮮海膽、鐘螺等，提供即捉即食海鮮大餐，大家可以就地於岸邊品嘗最新鮮海產！另外仲有導賞團，帶大家前往附近嘅海岸線欣賞奇岩異石呢。